JO sa Talisay tag-P2 mil na lay bonus

CEBU, Philippines - Ang mga Job Order sa city hall sa dakbayan sa Talisay  nadismaya tungod kay kasagaran kanila nagdahom nga makadawat og daku-dako nga bonus sama sa milabay’ng mga tuig.

Nasayran  nga  nakadawat  sila  og tag P5,000 ngadto sa P7,000  nga bonus  kaniadto, depende sa  ilang  gidugayon  sa pagtrabaho,  ug  may  bugas  ug  grocery  pa.

Apan karong tuiga  P2,000  ra   ang  ilang nadawat nga bonus  ug walay pakapin nga grocery ug bugas.

Hinuon  ang  uban bisan og dili sama kaniadto ang nadawat nilang bonus,  nalipay  ra  gihapon.

Si Talisay City Administrator John Yre De los Reyes nga nahinabi sa mga tigbalita nagkanayon  nga buot sa mayor nga mapareha kaniadto ang  madawat nga bonus sa mga JO.

Apan giingong si Talisay City Accountant Viluzminda Villarante maoy  misupak   tungod kay istrikto kaayo ang Commission on Audit (COA) bahin sa pagpagawas og budget ug igo lang silang misubay sa balaod.

Matud ni Yre nga gikwestiyon sa mayor ang maong tubag ni Villarante kung wala ba kini mosubay sa balaod kaniadto nga nakahatag man og dagkung bonus ngadto sa mga JO.

Gibutyag ni Yre nga si Talisay City Treasurer Emma Macuto mipamatuod nga adunay hustong  pundo ang siyudad ug puwede  unta  kining makahatag og bonus sa mga JO sama sa gipanghatag sa milabay’ng mga tuig.

Matud usab ni Yre nga sa ilang meeting ni Talisay City Budget Officer Edgar Mabunay iya kining gisultihan nga dili na unta mausab ang maong sitwasyon nga gamay lang ang nadawat nga bonus sa mga JO ug unta sa tuig 2014 paningkamutang mahimo  na  kining P10,000 .

Dugang ni Yre nga misaad kaniya si Mabunay nga sa buwan sa Hunyo sa sunod tuig maggahin na kini daan og budget alang sa mga bonus sa JO.

Subay niini si Yre  midugang nga ang JO karon sa siyudad gikan sa kapin sa 2,000 gipakubsan na nila kini ngadto sa 1,400  na lang. (/WC)(BANAT NEWS)