Bodega sa DOE nasunog

CEBU, Philippines - Kapin sa P100 mil ang danyos sa sunog nga miigo sa bodega sa buhatan sa Department of Energy (DOE) sa Metrobank Building sa Fuente Osmeña sa dakbayan sa Sugbo sa alas 11:25 sa miaging gabii.

Si SFO2 Daniel Relatado Jr, fire investigator miingon nga ang sunog didto miigo sa bodega sa buhatan sa DOE nga nahimutang sa ika-11 nga andana sa Metrobank building.

Ang maong building may 20 ka andana ug matud pa nga migawas ang dako kaayo nga aso sa ika-11 nga andana sa maong building.

Daling mitubag sa alarma ang kabomberohan apan naglisod kini og sulod sa ika-11 nga andana tungod sa kabaga sa aso.

Apan napalong ra hinoon sa kabomberohan ang kalayo sulod sa 10 ka minutos.

Padayon pa ang ilang pag-imbistigar sa sinugdanan sa maong sunog.Sutaon pa sab sa kabomberohan kung unsay sulod sa bodega sa DOE, wala hinuoy naangol sa maong sunog.

Subling mipahinumdom sa publiko si City Fire Marshall Rogelio Bongabong nga kanunay nga magmabinantayon aron malikayan ang sunog.  (BANAT NEWS)