DOLE gibahaa’g reklamo sa mga trabahante

CEBU, Philippines - Gibahaan og reklamo ang buhatan sa Department of Labor and Employment (DOLE)-7 gikan sa mga trabahante dinhi sa Sugbo nga wala makadawat sa ilang 13th month pay sa wala pa ang Pasko. Sigun pa sa tigpamaba sa DOLE-7 nga si Emmanuel Ferrer sa interview sa DYAB nga  mas daghan karon ang nagpakitabang sa ilang buhatan aron madawat nila ang maong benepisyo.

Kini human usab sa ilang subsub nga pagpahibawo ug pahimangno ngadto sa mga nanag-iya og mga negosyo nga mohatag sa 13th month pay sa tagsatagsa niini ka mga empleyado sa dili pa o atol sa petsa 24 ning bulan sa Disyembre agi og pagtuman sa Presidential Decree 851.

Subay niini si Ferrer niingon nga ubay-ubay karon ang mga kompanya nga kasagaran nagbase dinhi sa Sugbo ang ilang giimbistigar tungod sa reklamo  sa mga trabante.

Gani gipahibawo niini nga ang ilang buhatan nipadala na og labor compliance officer aron pagtino kun nakatuman ba kini sa balaod sa pamuo nga naghatag sa nahisgutang benepisyo.

Siya nagkanayon nga sa ilang pag-imbestigar posibling mautingkay usab ang ubang kalapasan sa mga gireklamong mga employers batok na sa ilang mga trabahante.

Apan iyang gitataw nga hatagan sa DOLE og kahigayonan ang gipangreklamong mga employers sa pagtuman sa maong balaod sa dili pa hingpit nga mopasaka ang  DOLE og tukmang kaso batok sa nahisgutang mga magpapatigayon. Midugang  si Ferrer nga bisan ang mga katabang mahimong makareklamo sa ilang buhatan aron makakuha sa maong benepisyo base sa Republic Act 10361 kon Batas Kasambahay nga nahimong balaod karon lamang tuiga. (BANAT NEWS)