CEBU, Philippines - Patay ang usa ka gwardiya human kini gi-shotgun sa laing gwardiya kagahapon sa kaadlawon diha sa Deca Homes Subdivision, barangay Dumlog dakbayan sa Talisay.
Ang biktima kansang tiyan maayong pagkababha, mao si Warlito Astacan, Jr., 36, residente diha sa sitio Aromahan, Dumlog ug gwardiya ubos sa Golden Sun Security Agency (GDS) ug nadestino diha sa nahisgutang subdivision.
Ang mga suspetsado mao sila si Reynante Flores, 23, ug Jason Bisangcay, 20, pulos residente diha sa sitio Lawis, barangay Candulawan, dakbayan sa Talisay mga sakop sa EFM Security Agency ug nadestino usab diha sa nahisgutang subdivision.
Kahinumduman nga niadtong Sabado sa kaadlawon si Astacan uban sa laing gwardiya nga si Ricardo Austria ang midis-arma sa gwardiyang si Rackmark Espina ug sa crane operator nga si Rodolfo Basalo.
Kini human sila giingong parehong hubog ug nagmaoy ug nagpabuto og armas diha sa subdivision. Si Espina, Bisangcay ug Flores managkauban sa usa ra ka security agency.
Si Bisangcay ug Flores mitahan sa mga kagawad sa barangay Candulawan nga sila si Bello Bacalso, Aling Bacalso ug Rodolfo Torregoza ug gitugyan sila ngadto sa kapolisan lakip ang ilang service firearms nga usa ka 12- gauge nga shotgun nga dunay duha ka buhing mga bala ug usa ka kabhang ug usa ka kalibre .38 nga revolver nga dunay upat ka buhing mga bala ug usa ka kabhang usab sa bala niini.
Si Flores nga nahinabi sa Banat News mibutyag nga kauban nila kaniadto og security agency si Astacan apan nataktak kini human niya gisumbong nga dunay dili maayong gibuhat.
Human mataktak sa ilang security agency si Astacan, mibalhin kini sa GDS Security Agency.
Matud sa duha, ang biktima diha nadestino sa entrada sa subdivision samtang silang duha diha sa Phase 2 sa sudlunong bahin sa subdivision.
Ang duha ka mga suspetsado mipasangil kang Astacan nga hubog ug misulong ngadto sa ilang pwesto ug samtang naglingkod sila gihapsan sila niini og kabilya.
Tungod niini, nag-warning shot si Flores sa iyang kalibre .38 nga revolver ug gibadlong si Astacan nga magpuyo tungod kay hubog kini apan giingong gibaharan sila niini nga pamatyon.
Si Flores mipasangil nga si Astacan duna kini upat ka laing mga kauban nga giingong mga armado niadtong tungora.
Matud ni Flores nga sa kahadlok nga sila maoy pamatyon sa grupo ni Astacan, gikuha niya ang shotgun ni Bisangcay ug gipusil niya si Astacan sa tiyan, patay na kini pag-abot sa Talisay City District Hospital.
Ang duha ka suspetsado mihimakak nga dunay kalambigitan sa pagdis-arma ni Astacan sa ilang kauban ang ulahing hitabo tungod kay duha pa lang ka adlaw si Espina sa ilang agency.
Ang duha miangkong wala pa sila’y mga lisensiya isip mga security guards tungod kay giproseso pa kini.
Si Superintendent Resty Santos, officer-in-charge sa Talisay City Police Station sa pakighinabi sa Banat News kagahapon nagkanayon nga ang mga suspetsado ipaubos sa paraffin test samtang ang mga armas niini ipaubos usab sa ballistic examination.
Matud usab ni Santos nga susihon usab nila kung duna bay mga lisensiya ang armas sa duha ka mga suspetsadong gwardiya. Ang duha gikatakdang pasakaan og kasong murder karong adlawa. (BANAT NEWS)