Esnaberong taksi drivers gibantayan sa LTFRB
CEBU, Philippines - Wala pay nadawat nga reklamo ang Land Transportation Franchising and Regulatory Board (LTFRB)-7 batok sa mga drayber sa taksi nga mobalibad o mo-snub og mga pasahero.
Si LTFRB Ahmed Cuizon mibutyag kagahapon sa Banat News nga duna siya’y mga personnel nga gipakatap sa mga mall ug bus terminals aron mabantayan ang mga drayber sa taksi nga mobalibad pasakay og pasahero.
Gawas niini, gibantayan usab ang mga taxi nga magpa-over charging sa mga pasahero ug kadtong mangontrata inay nga mogamit sa ilang metrohan.
Mabantayan nga niining nagsingabot na ang Pasko ug Bag-ong Tuig nagsugwak ang mga pasahero diha sa kadalanan ug malls ug ang resulta mag-inilogay sa mga sakyanan ilabi na sa kagabhion.
Nunot niini, si Cuizon mibutyag nga sugod niadtong Huwebes ang LTFRB miisyu na og special permit ngadto sa mga public utility vehicles.
Ang mga bus units nga gustong mobiyahe sa dili nila mga rota kinahanglang mobayad og P260 sa special permit. Ang maong special permit epektibo sulod sa unom ka adlaw gikan sa adlaw kung kanus-a kini gamiton.
Samtang sa mga public utility jeep P130 lang ang special permit. Ang mga PUJ hatagan kini og special permit kung pakyawon. (BANAT NEWS)
- Latest
