Videokehan sa Consolacion gibantayan na’g polis

CEBU, Philippines - Higpit nga gibantayan sa kapolisan ang  pundok  sa  mga  batan-on nga gituohang sakop sa nagkaatbang nga fraternity nga mosulod  sa videokehan sa dalan national sa barangay Pitogo, lungsod sa Consolacion   matag  gabii  ilabi  na  sa adlaw  sa Pasko  ug  Bag-ong Tuig.

Ang kamandoan  sa  pagbantay  naggikan kang  Chief Inspector Marlon Gumabao , hepe  sa kapolisan  sa maong  lungsod  gumikan   sa pagpamusil   sa  miaging  gabii  nga  misangpot  sa kamatayon sa biktima  nga wala masulbad hangtud  karon.

Si PO1 Richard Pogoy sa kapolisan sa maong  lungsod  nga nahinabi sa Banat News miingon nga ang mobile patrol maoy gidistino sa pagbantay sa maong  lugar  sa panahon sa kagabhion.

Dugang pa niya  nga may  beat police  usab ang  mall  sa maong  lugar nga  mobantay  aron  wala  nay  pinusilay  nga  mahitabo, ilabi  na  sa Pasko  ug  sa Bag-ong  Tuig.

Si PO1 Pogoy miingon nga ang nagkaatbang nga  fraternity   nga  mao ang  Crips ug Blood maoy sagad nga magtagbo sa maong dapit ug sa gamay lang nga panagbikil mosangko gilayon sa pagpamusil. Busa  misaad  si Pogoy   nga  sila’y  modesiplina  niining  mga  tawhana. (BANAT NEWS)