Duha gipamusil, usa patay

CEBU, Philippines - Gipusil patay ang usa ka lalaki nga naglingkod sa atubangang bahin sa balay sa iyang iyaan sa sitio Mahayahay 2, barangay Calamba sa dakbayan sa Sugbo sa alas 10:30 sa miaging gabii. Ang biktima naila nga si Charlie Malipay, 22, molupyo sa samang lugar. Ang suspetsado naila nga si Chelloner Lumapas alyas Christian, wa pa matino ang pangidaron ug kun asa kini magpuyo.

Base sa blotter sa Homicide Section sa Cebu City Police Office nga sumala pa sa mga saksi nga ilang nahinabi nga naglingkod lang ang biktima sa atubangang bahin sa balay sa iyang iyaan dihang kalit mibutho ang suspetsado ug mipabuto sa iyang armas sa pipila ka higayon.

Ang biktima naigo sa wala nga abaga, sa ibabaw nga bahin sa iyang  wala nga buko-buko, ug milapos sa iyang liog ug tuong abaga. Ang biktima daling gidala sa Cebu City Memorial Medical Center apan gideklarar nga dead on arrival sa mga doktor sa maong tambalanan. Samtang ang suspetsado daling nakasibat dihang naabot ang kapolisan sa lugar nga nahitaboan. Wala pay lead ang kapolisan sa motibo sa maong pagpamusil.

Samtang usa ka lalaki nga padulong mosimba ang naigo sa saag nga bala samtang nagdrayb kini sa iyang multicab sa barangay Anajao sa lungsod sa Argao sa alas 6:00 sa miaging gabii. Ang naigo sa bala naila nga si Cord Blademir Chong, 28, molupyo sa nahisgutang lugar.

Base sa imbestigasyon sa kapolisan nga ang biktima nagmaneho sa multicab aron mosimba sa barangay Colawin sa lungsod sa Argao. Samtang nagdagan ang multicab nga gimaneho sa biktima kalit lang kini nga naigo sa bala sa iyang tuo nga tiil. Gidala ang biktima sa Isidro Kintanar Memorial Hospital apan gibalhin dayon kini sa Vicente Sotto Memorial Medical Center. (BANAT NEWS)