Mayor ug pamilya gi-ambush sa NAIA Terminal 3, upat patay

CEBU, Philippines - Patay ang mayor sa Labangan, Zamboanga del Sur lakip na ang tulo niya ka mga kauban diha mismo sa Ninoy Aquino International Airport terminal 3, kagahapon sa dayong udto sumala pa sa report sa GMA News.Tv.

Ang general manager sa Manila International Airport Authority (MIAA) nga si Jose Angel Honrado, nga gikutlo sa maong balita miila sa namatay nga mao si Mayor Ukol Talumpa sa lungsod sa Labangan, Zamboanga del Sur.  Duha ka mga lalaking giingong nagsakay og motorsiklo ug nagsuot og police uniforms ang mga gunmen.

Patay na kini pag-abot sa Philippine Air Force General Hospital. Gawas sa maong mayor laing tulo usab ang namatay ug upat usab ang nangaangol sa maong pagpamanhig.

Ang mga kauban ni Talumpa nga gi-ambush mga miyembro sa iyang pamilya lakip na ang iyang security escorts.

Namatay usab sa maong pagpamanhig ang asawa sa mayor, lakip na usab si Salipudin Talumpa ug ang napagan nga kapin sa usa pa ka tuig nga batang naila sa pangalan nga Phil Thomas Lirasan kansang mga kabanay naangol usab.

Matud pa nga mao pay pag-abot ni Talumpa ug sa iyang kaubanan gikan sa Mindanao apan nagpaabot nang daan ang gunman diha sa loading bay sa gawas sa airport building.

Gimando karon ni Department of Justice secretary Leila de Lima sa National Bureau of Investigation nga moimbestigar dayon sa maong kaso. (BANAT NEWS)