CEBU, Philippines - Usa ka lalaki ang napalgang patay sa iyang kapuyo diha sulod sa ilang balay sa sitio Laray, barangay San Roque, dakbayan sa Talisay ang usa ka 37-anyos nga lalaki kinsa giingong naghikog kagahapon sa kaadlawon.
Giila ang naghikog nga mao si Danilo Labuga, nagbitay na kini sa sulod sa ilang balay nga dunay higot nga nylon nga pisi ang liog ug ang pikas tumoy gihigot kini ngadto sa kisame.
Si Labuga daling gidala ngadto sa Talisay City District Hospital apan patay na kining nadangat sa maong tambalanan.
Ang tanod sa barangay maoy mi-report ngadto sa kapolisan kabahin sa hitabo.
Sa imbestigasyon sa mga polis nga si Labuga ug ang kapuyo niining si Ladylen Salado giingong nag-away ug mibahad ang lalaki nga maghikog apan wala kini panumbalinga sa babaye.
Milakaw ang babaye apan sa iyang pagbalik naabtan na niyang nagbitay na kini ug wala nay kinabuhi.
Si Kagawad Rafael Chan sa pakighinabi niini sa Banat News kagahapon mibutyag nga ang duha kanunay kining mag-away ug si Salado molakaw gyud kini kung mag-away sila ni Labuga. (BANAT NEWS)