CEBU, Philippines - Nangagupok ang kabukogan ug grabeng naangol ang usa ka tawo nga gituohang adunay kabilinggan sa pangisip nga gituohang naghikog pinaagi sa paglayat ikaduhang andana sa kampanaryo sa San Narciso Parish Church sa Occidental Poblacion sa lungsod sa Consolacion sa miaging sayo sa buntag pipila lang ka gutlo human sa Misa de Gallo.
Si PO1 Albert Jiminez sa kapolisan sa nahisgutang lungsod nga nahinabi sa Banat News miila sa maong lalaki nga mao si Emerberto Pilapil, 30, taga sitio Cambiohan sa barangay Casili sa nahisgotang lungsod.
Matud pa ni Jiminez nga walay nakamatikod kang Pilapil nga misaka sa kampanaryo nga gibanabanang 40 ka tiil ang gihabugon.
Dihang kini nakit-an, nagpatong na kini sa ibabaw apan wala pa gani makapanawag og polis ang mga tawo gikatahong milayat na kini dayon sa ubos hinungdan sa grabeng pagkaangol nga nahiaguman.
Dugang pa ni Jiminez nga pagkakita ni Pilapil nga gitan-aw na siya sa mga tawo kalit kini milayat diha sa ubos, dali siyang gikarga og ambulansiya ug gidala sa Vicente Sotto Memorial Medical Center.
Sumala pang Jiminez nga dugay sila nga nakakuha sa pangalan sa maong lalaki ug naglisod sila sa pakig-estorya niini tungod kay tulibagbag ang tubag niini. (BANAT NEWS)