Mga biktima sa aksidente sa Ceres Bus di mokiha
CEBU, Philippines - Di interesado nga mopasaka og kaso ang mga biktima sa nalimbuwad nga Ceres Bus sa barangay Balhaan sa lungsod sa Badian nga miresulta sa kamatayon sa asawa ug anak sa drayber niini sa miaging adlaw.
Sumala pa ni PO2 Bismarck Babiera, desk officer sa Badian Police Station nga nahinabi sa Banat News nga sa pagsusi nila sa mga biktima dili sila tanan interesadong mopasaka og kaso batok sa kompanya sa Ceres.
“Among gisuroy gahapon sa hapon, walay willing mo-file og kaso,†sumala pa ni Babiera. Giingong ang rason niini mao nga giabaga sa maong kompanya ang mga galastohan sa tambalanan sa maong mga biktima.
Gani sumala pa sa polis nga hasta ang kabanay sa namatay nga anak ug asawa sa drayber dili usab interesado nga mopasaka og kaso kaniya ug sa Ceres Bus.
“Amo nang giadto sa Wireless (Mandaue City) dili man interesado ang igsoon sa biktima,†dugang ni Babiera.
Matud ni Babiera nga bugtong ang “apprehension report†lamang ang nahatod sa kapolisan sa lungsod sa Badian ngadto sa Land Transportation Office sa dakbayan sa Carcar.
Samtang matud pa ni Babiera nga giandam na nila ang kasong Reckless Driving nga ipasaka sa maong suspetsado sa Municipal Circuit Trial Court ngadto sa Moalboal.
Ang drayber sa Ceres Bus sumala pa ni Babiera natanggong gihapon sa karsel sa kapolisan sa lungsod sa Carcar apan kung wala gyu’y mosang-at og kaso posibling mabuhian kini karong alas 9:00 sa buntag. (BANAT NEWS)
- Latest
