CEBU, Philippines - Gipasar na sa hunta probinsiyal sa Sugbo ang 2014 annual budget nga wala na moagi sa init nga debate atol sa ilang katapusang sesyon ning tuiga kagahapon.
Si Bokal Grecilda Sanchez, ang pangulo sa committee on budget and appropriation sa hunta probinsiyal, ang niduso nga ipasar na ang P2.6 bilyones nga giduso ni Gob. Hilario Davide III.
Matud pa ni Sanchez nga natuki na ang budget atol sa mga hearings nga ilang gipahigayun hinungdan nga dili na angayang lalisan pa kung usbon ba o dili ang giduso ni Davide.
Mayoriya hinoon sa mga sakop ang kaalyado ni Davide sa Liberal Party.
Ang 2014 budget mas ubos og P1 bilyon itandi ning tuiga nga giduso pa ni kanhi gobernador, karon Kong. Gwendolyn Garcia.
Sa P2.6 bilyones nga budget, P726.12 milyones alang sa general services; P1.38 milyones alang sa social services; ug P490.47 milyones sa economic services sunod tuig. Ang mga dagkung proyekto ni Davide balor og P407 milyones nalatid sa Annual Investment Plan isip kabahin sa annual budget.
Kini naglakip sa mga karsada, taytayan, pamalit og heavy equipments, pagtoon sa Trans-axial Highway, paghatag og hinabang sa mga lokal nga kagamhanan, ug uban pa.
Ang buhatan sa gobernador adunay P65 milyones alang sa maong katuyoan, ang bise gobernador adunay P8 milyones samtang tag P2.5 milyones matag bokal ubos sa AIP.
Hinuon sa annual budget, adunay dugang tag P2.5 milyones ang mga bokal isip Legislative Assistance Fund samtang P21 milyones alang sa bise gobernador. (BANAT NEWS)