Publiko giawhag mosumbong og husto sa polis

CEBU, Philippines - Ang officer-in-charge sa Talisay City Police Station nga si Superintendent Resty Santos nanawagan sa publiko ilabi na sa mga mabiktima sa kawat ug ubang krimen nga mohatag og klaro  nga impormasyon ngadto sa polis aron masikop ang mga responsable. Kagahapon si Santos nasagmuyo sa usa ka menor de edad nga babaye kinsa giingong nabiktima sa tulis niadtong Martes  sa barangay San Roque.

Gibutyag sa OIC nga ang maong menor mi-report   sa police station ug  misumbong  nga  gitulis siya sa mga lalaking nagsakay og motorsiklo. Unya   nadala  kuno  sa mga tulisan ang iyang personal nga butang lakip na niini ang mahalon nga cell phone. Matud ni Santos nga gisukit-sukit nila ang biktima ug dayon gipakuyogan sa mga operatiba sa pamasin nga maabtan pa ang mga tulisan.

Apan giingon  nga  dili na consistent ang mga gipanulti niini  ilabi na sa motorsiklo nga giingong gisakyan sa mga tulisan  kay lain-laing brand ang   iyang  gitumbok.

Gibutyag usab ni Santos nga ang maong menor giingong usa ka gabiing wala makauli sa ila tungod kay giingong gitulis kini. Gawas niini wala usab kini makatambong sa iyang klase hinungdan nga nangayo og police report aron ikapakita sa iyang mga magtutudlo  nga nabiktima kini sa tulis hinungdan wala makatambong sa klase.

Si Santos mihangyo sa publiko ilabi na kadtong mabiktima sa kawat ug ubang krimen nga unta mohatag og hustong impormasyon sa kapolisan aron masikop ang mga responsable.

Dugang ni Santos nga silang mga polis mosukit-sukit gyud  ngadto sa biktima aron makakuha og tukmang mga detalye sa hitabo ug makompirma nga ang mi-report matinud-anon ngadto sa mga polis.  (BANAT NEWS)