CEBU, Philippines - Pasakaan og kaso karong Lunes si Rogelio Acojedo kinsa gitumbok nga lider sa grupo sa mga guns for hire ug robbery gang nga nalambigit sa pagpanulis ug pagpatay dinhi sa Sugbu sa nakalabay nga duha ka semana. Si Acojedo nasikop sa mga sakop sa Special Weapons and Tactics sa miaging adlaw nga maoy gitudlo ni Sandy Kho. Si Kho mao ang unang nadakpang miyembro sa maong grupo sa usa ka police checkpoint sa Lapu-Lapu City.
Si Sr. Supt. Noli Romana ang hepe sa Cebu City Police Office miingon nga padayon na nilang giandam ang mga kaso nga ipasaka nila ni Acojedo mao ang kalambigitan niini sa kamatayon ni Edgar Cañete kinsa gipusil patay niadtong Disyembre 2 diha sa Banilad, Cebu City.
“’Yong pagka-link niya sa murder ni Mr. Cañete,†sumala pa ni Romana.
Gawas pa niana mag-atubang sab kini og kaso sa paghupot niini og kalibre .45 ug granada sumala pa sa opisyal. Ang paghupot og eksplosibo sama sa granada way piyansa.
Nasikop si Acojedo sa SWAT sa miaging adlaw tungod kay gitawagan sa City Director sa Lapu-Lapu City Police Office Sr. Supt. Rey Lendon Lawas ang kapolisan sa dakbayan sa Mandaue ug sa Sugbo.
“Yesterday we got a report nga sighted siya ngadto nga nagdala’g suspected bag,†sumala pa ni Lawas.
“So we called up MCPO,CCPO nga gihatag nato ang description sa sakyanan fortunately na-intercept siya sa Cebu City,†dugang pa ni Lawas.
Si Romana miingon nga karon ilang gitino kung kinsa ang laing duha ka mga lalaki nga miyembro sa maong grupo ug kun duna pa bay lain nga miyembro niini.
Naghulat na lang si Romana sa resulta sa digital forensics sa cellphone ni Acojedo ug ni Kho apan upat pa lang ka mga pangalan ang mitumaw sa ilang imbestigasyon nga mga miyembro sa maong grupo.
“Right now ang na-identify natin apat pa lang, pag na-analyze na natin ang mga cellphones pwede na natin malaman,†asoy ni Romana. Apan dugang ni Romana nga ang mga impormasyon nga nakuha nila sa pagkakaron nagpunting ngadto kang Acojedo nga maoy nagsilbing pinanser, planner ug leader sa maong grupo.
“Hinihintay natin ang result ng digital forensics, according sa interview natin kay Sandy Kho…it points to him,†dugang ni Romana.
Samtang kagahapon sa buntag nakadawat og taho ang kapolisan sa dakbayan sa Lapu-Lapu nga adunay gi-abandonar nga sakyanan sa usa sa mga malls sa maong lugar.
Gipasusi matud pa ni Lawas sa kapolisan ang maong taho ug nasuta nga ang maong sakyanan mao ang closed-type multicab ni Acojedo nga gigamit niini sa wala pa siya mosakay og taxi padulong sa dakbayan sa Sugbo. Sumala pa ni Lawas nga iya pang gitun-an ug sa legal department sa kapolisan kung pwede ba nilang ablihan ang maong multicab o magkinahanglan og search warrant. (BANAT NEWS)