PAF reservist maoy “lider” sa rob gang

CEBU, Philippines - Nasikop sa mga sakop sa Special Weapons and Tactics ang usa ka reservist sa Philippine Air Force nga maoy gitudlo ni Sandy Kho nga maoy ilang lider sa gun for hire ug robbery group pasado alas 11:00  kagahapon sa buntag sa M.J. Cuenco Avenue sa dakbayan sa Sugbo.

Ang nasikop naila nga si Rogelio Acojedo, usa ka real estate broker, molupyo sa dakbayan sa Lapu-Lapu.Dihang nahinabi si Acojedo sa mga tigbalita mihimakak kining managkaila sila ni Sandy Kho ug wala siya’y kalambigitan sa mga gipasangil niini ilabi na ang pagtumbok kaniya nga siya ang lider sa gun for hire ug robbery group nga giapilan ni Kho.

Sumala pa ni Acojedo nga gikan siya sa Leyte kay nanghatag og relief goods  ug dako na lang kahibulong niya nga gi-raid ang iyang balay sa gituohan niyang mga taga Philippine Drug Enforcement Agency.

Busa mipadulong unta sa buhatan sa PDEA si Acojedo aron sa pag-clear sa iyang ngalan apan nasigpatan siya sa mga polis samtang siya nagsakay og taxi.Matud ni Melchor Abellaneda, drayber sa Yen Taxi nga misakay si Acojedo sa usa ka mall sa dakbayan sa Lapu-Lapu ug nagpahatud kini sa R. Landon sa buhatan sa PDEA.     Sumala pa sa drayber nga may kuyog nga duha ka babaye si Acojedo dihang misakay kini sa iyang taxi apan pag-abot nila sa M.J. Cuenco milagubo ang iyang taksi mao nga mihunong siya aron pagsusi.

Ug diha na nahitabo ang pagdakop kang Acojedo, gikatahong nakuhaan kini og calibre 45 pistola ug usab ka fragmentation grenade apan gihimakak niya nga iya ang maong mga armas.

Human sa imbestigasyon gibuhian ra dayon si Abellaneda (/EIM)(BANAT NEWS)