Reblocking ipatuman sa nasunogan
CEBU, Philippines - Gusto ni Mayor Michael Rama nga hapsayon ang pagtukod pagbalik og kabalayan sa dapit nga nasunogan sa Barangay Carreta ug Tejero pinaagi sa pagpahigayon og “reblocking.â€
Ang reblocking mao ang pagmugna og mga karsada nga magsilbi nga access road paingon sa sudlonon nga bahin sa mao nga mga sitio sa tumong nga makasulod ang mga bombero kun may sunog.
Kapin sa 300 ka pamilya nga naglambigit og kapin sa usa ka libo ka mga tawo ang nawagtangan og panimalay dihang miulbo ang dakung sunog sa pipila ka sityo sa Barangay Tejero ug Carreta pipila ka adlaw ang milabay.
Matud ni Rama nga miuyon na si Carreta Barangay Captain Eduardo Lauron nga ipahigayon ang reblocking sa dapit nga nasunogan. Giplano ni Rama nga padak-an ang karsada nga nagsilbi nga ganghaan sa Doña Pepang Cemetery.
Ang maong dapit nga nasunogan gisusi pag-usab ni Rama kagahapon, apil ang dapit nga nasunog didto sa Barangay Quiot ug Kinasang-an.
Si Mayor Rama miingon nga nahinangop siya nga ang direktor general sa Philippine National Red Cross (PNRC) nga si Richard Gordon misaad pagtabang sa mga biktima sa sunog pinaagi sa paghatag kanila og 200 ka tulda.
Gibutyag ni Rama nga gimando niya sa Department of Social Welfare and Services (DSWS) nga paspasan ang pag-andam sa mga dukomento alang sa paghatag og construction materials sama sa tag-napulo ka sin ug plywood sa mga pamilya nga nabiktima sa sunog. (/WC)(BANAT NEWS)
- Latest
