CEBU, Philippines - Binilyon ka pesos ang mawala sa gobiyerno kung patas-an ang tax exemptions sa 13th month pay sa mga trabahante sumala pa ni Bureau of Internal Revenue (BIR) Commissioner Kim Henares.
Si Henares miluwat sa maong pamahayag tungod sa giduso nga resolusyon ni Senate President Pro Tempore Ralph Recto nga nanawagan sa pagpataas sa tax exemption sa mga bonuses sama sa 13th month pay.
Buot ni Recto nga kadtong mga bonus nga mokabat og P75 mil paubos dili na pabayron og buhis. Sa pagkakaron, P30 mil paubos ra nga 13th month pay maoy exempted sa buhis sa BIR.
Apan napanglantawan ni Henares nga kulangon gyud ang pundo sa gobiyerno nga gikuha gikan sa mga buhis kung tugutan sa mga magbabalaod ang maong sugyot.
Maproblema usab ang gobiyerno kung asa mokuha og ikatapal sa maong mawala nga buhis ug posibleng mangita sila og laing opsyon kung asa makapatong og dugang buhis. (BANAT NEWS)