CEBU, Philippines - Usa ka Amerkano ang napalgang patay ug may laslas sa iyang pulso ibabaw sa higdaanan sulod sa giabangan niya nga kwarto sa usa ka hotel sa dalan F. Ramos sa barangay Sta. Cruz sa dakbayan sa Sugbo sa alas 2:45 sa miaging hapon.
Ang namatay naila nga si Jordan Eliot Pease, 33, molupyo sa Oklahoma sa USA. Sumala pa ni Chief Insp. Noli Cernio ang OIC sa homicide section sa Cebu City Police Office nga nahinabi sa Banat News nga usa ka empleyado nga gisugo sa iyang labaw pagsusi sa lawak ni Pease maoy nakakaplag kaniya.
Ang maong US citizen nakaangkon og samad sa iyang duha ka pulso ug wala nay vital signs dihang gihiling sa mga sakop sa Emergency Unit Foundation (ERUF).
Matud pa ni Cernio nga posibleng kaduha naglaslas ang maong lalaki tungod kay ang mga pat-ak sa dugo nagsugod pa sa pansayan sa iyang kwarto padulong na sa higdaanan niini.
Nakita sa mga mirespondeng polis ang daghang canned beer ug ang usa ka folding knife nga nagkadugo pa diha sa lawak.
Dugang ni Cernio nga nakit-an sab sa mga miresponding polis nga maayong pagkahigot sa bed sheet sa kwarto sa maong lalaki ngadto sa cabinet nga gihigot ang tumoy niini timaan nga walay komosyon nga nahitabo sa sulod sa maong lawak. (BANAT NEWS)