CEBU, Philippines - Napamatud-an nga nagpabiling lig-on ang partidong Alayon sa dakbayan sa Talisay nga gipangulohan ni Kongresista Gerald Anthony “Samsam†Gullas human sa gipahigayon nga piniliay sa Association of Barangay Council kagahapon sa buntag.
Midaog sa maong piniliay si Bulacao Barangay Kapitan Raul Cabañero sa Alayon batok ni Ofelia "Fe" Ylanan sa Linao nga ubos sa Liberal Party.
Gipahigayon ang maong eleksyon sa Talisay City Peoples Hall nga kulbahinam kaayo ang resulta gumikan kay duha ka puntos lang ang deperensya sa duha ka kandidato.
Nakakuha si Cabañero og 12 puntos ug si Ylanan nakakuha og 10 puntos lamang.
Ang maong piniliay gitambongan sa 22 ka mga kapitan sa dakbayan sa Talisay.
Mapasalamaton si Cabañero sa iyang mga kaubanan nga mibotar kaniya ug sa mga Gullas sa ilang suporta ug matud pa niini, iyang ipadayon ang plano nga hangyoon ang mayor nga tagaan og kaugalingong building ang ABC.
Samtang si Ylanan midawat sa iyang kaparotan sa maong piniliay ug matud niini nga limpyo ang maong piniliay.
"I accept the result of the election. It was a clean election," sumala pa ni Ylanan.
Gipahigayon ang piniliay sa ABC sa dakbayan sa Talisay pinasikad sa Local Government Code nga nagmando niini.
Ipahigayon sab ang piniliay sa provincial chapter sa ABC sa Disyembre 18 ug ang eleksyon sa regional, national ipahigayon sa Enero 16 sa sunod nga tuig. (BANAT NEWS)