CEBU, Philippines - Mikabat ngadto sa 363 ka mga public utility vehicles (PUV) nga walay mga sticker sa PWD kon “Person with Disability†ang gipangdakop sa gipahigayong operasyon sa City Traffic Operation Management (CITOM).
Si Joy Tumulak, operation officer sa CITOM mibutyag sa Banat Manobela kagahapon nga misuporta sila sa giluwatan nga resolution ni Cebu City Councilor Alvin Dizon kabahin sa selebrasyon sa International Day for PWD niadtong Disyembre 3, 2013.
Matud ni Tumulak nga niadtong Disyembre 3, 2013 nagsugod ang ilang operasyon hangtud sa Disyembre 5, 2013.
Ang maong mga PUV gilangkuban kini sa 197 ka mga public utility vehicle (PUJ), 164 ka mga taxi ug duha ka mga bus. Ang maong mga PUV nakalapas kini sa Commemorative Act-146 o Batas Pambansa Bilang 344.
Matud usab ni Tumulak nga kung Temporary Operator’s Permit ang ilang i-isyu sa nakalapas ang drayber maoy mobayad niini.
Sa maong kalapasan ang drayber mobayad kini og P500, kompiskahon ang iyang lisensiya ug kinahanglang kuhaon niya kini sulod sa tulo ka adlaw apan sa dili pa ihatag ang iyang lisensiya ipaubos una siya sa usa ka oras nga seminar.
Apan kung Inspection Report Summon (IRS) ang ilang i-isyu ang multa niini mokabat gikan sa P1,000 ngadto sa P2,000 ug ang operator maoy pabayaron sa maong multa. Ang IRS gikan kini sa Land Transportation Franchising and Regulatory Board (LTFRB).
Ang tanang mga PUV gi-require gyud sa pagbutang sa maong sticker.
Ang PWD sticker anha kini mapalit sa buhatan sa Department of Social Welfare and Services (DSWS) sa Cebu City Hall. Ang kantidad sa maong sticker kapin lang kini sa P100.
Ang maong sticker kolor blue nga dunay logo sa DSWS, LTO, LTFRB, City Hall ug PWD gawas niini duna usab kini control number.
Usa sa maong sticker anha ipapilit sa gawas sa windshield sa sakyanan ug ang usa ka dunay drawing nga wheel chair anha kini ibutang sa sulod sa windshield.
Gibutyag ni Tumulak nga niining ulahi lang dunay mitumaw nga mga sticker sa PWD nga kolor puwa, violet ug green apan naghuwat pa sila og formal letter gikan sa DSWS kabahin sa maong sticker una sila mogama og aksiyon.
Apan usa ka drayber nga nagbiyahian sa Mabolo nga gikahinabi sa Banat Manobela ang mireklamo nga dili makatarunganon ang pag usab-usab sa kolor sa mga stickers.
Ang maong drayber nga nanag-iya sa pasaheroan dunay kolor pula nga PWD stickers, sumala pa niya P295 ang iyang palit niini gikan mismo sa opisina sa PWD. Kauban niini ang mga kapares nga stickers diha sa sulod nga bale og upat tanan ka stickers.
Sumala pa niya nga tulo ka tuig una pa sila mo-renew sa maong stickers.
“Kung ingon ana, moingon sila nga peke ning amoa (pulang PWD sticker) wa mi pirme dag-anan. Unsaon man namo pagkahibalo nga peke diay to nga sa mismong opisina man sa PWD namo ni napalit? Kung ilaha gyud nang ipamugos aw mag-abot gyud ta sa director, binuang man na,†matud pa niya.
Gusto niya nga kung mahimo dili lang sila isyuhan og citation o ba kaha TOP tungod kay “in good faith†man ang ilang paglukat niini kaniadto diha sa buhatan sa PWD. Mas maayo nga hatagan sila og panahon aron makapalit sa saktong sticker ug kinahanglang ilang dakpon ang namaligya anang dili kolor blue nga PWD stickers diha mismo sa sud sa PWD office.
Ang maong drayber mipakita pa sa Banat Manobela sa mga resibo niya sa paglukat sa maong stickers.
Ang DSWS dunay master list sa mga molukat og sticker diin kung dunay PWD nga moreklamo kung makuha niya ang plate number sa PUV masubay dayon kini.
Kagahapon temporaryo una nilang gihunong ang ilang operasyon tungod kay nahutdan og sticker ang DSWS ug naghuwat lang usab sila og kamanduan sa ilang labaw kung kanus-a sila mobalik sa ilang operasyon.
Matud ni Tumulak nga dunay mga PWD ang mireklamo nga dili pasakyon sa ubang mga PUV tungod kay hasolan nga magpasakay kanila.
Dugang ni Tumulak nga taud-taud na ang maong national law kabahin sa PWD apan nabantayan nga wala kini istriktong naimplemento tungod kay ubay-ubay sa mga PUV ang wala motuman niini. (/EIM)(BANAT NEWS)