Kapolisan miawhag sa publiko nga di mogamit og pabuto

CEBU, Philippines - Giawhag sa Deputy Regional Director for Operations sa Police Regional Office 7, Sr. Supt. Orlando Ualat ang mga ginikanan sa dili pagpalit og mga pabuto sa Pasko ug sa Bag-ong Tuig. Matud ni Ualat nga peligro kaayo kini bisan pa kung ginagmay lang ang gamiton sa mga bata.

“It’s dangerous even in small amounts, parents should encourage the children to use other means,” sumala pa ni Ualat. Sumala pa sa hepe sa Regional Intelligence Division sa PRO7, Supt. Pablo Labra II nga peligro kaayo sa mga tawo nga mangagi sa karsada ang mga pabuto. “Dangerous and harmful kaayo pabuthan man gud ang nangagi sa kadalanan,” matud pa ni Labra.

Matud pa sa hepe sa Firearms Explosives Security Service Agency and Guards Supervisory Section (FESSAGS) Supt. Marvin Sanchez nga namenosan na og 33% ang mga namaligya og mga illegal nga pabuto sa miaging tuig.

Si Sanchez miingon nga naghimo na sila og operasyon batok sa mga pabuto sugod pa niadtong Oktubre.

Miangkon si Sanchez nga kulang gyud og tawo ang ilang opisina apan ilang gihimo ang tanan sa pag-monitor sa mga illegal nga namaligya og pabuto.

Ang public information officer sa PRO7 Supt. Renato Dugan miingon nga naa ra gyud sa katawhan ang kasulbaran sa paghunong sa maong illegal nga kalihokan kay kung walay mopalit og mga pabuto wala say mamaligya.

“Kung walay mopalit wa man say mamaligya,” matud pa ni Dugan. (Bryner Diaz/EIM)

Davao gitay-og magnitude

5 nga linog

Gitay-og og magnitude 5 ang pipila ka mga dapit sa Mindanao alas 7:58 ang takna kagahapon sa buntag nga tectonic ang origin sumala pa sa gipadayag sa Philippine Institute of Volcanology and Seismology (Phivolcs) Mactan Specialist Rolando Montañez nga nahinabi sa Banat News kagahapon.

Matud pa niya nga nasinati sa katawhan sa dakbayan sa Davao ang intensity 5 ug intensity 4 usab ang mga sikbit nga mga lungsod sa Davao del Sur ug Davao Oriental apan wala pa sila makadawat og mga taho nga nakasinati kini og kadaut sa maong dapit.  

Ang Phivolcs nagkanayon nga ang pagtay-og sa Mati  ug Toril, Davao del Sur may gikusgong intensity 5.

Nabatyagan usab ang Intensity IV: sa Digos City; Don Marcelino ug Malita, Davao del Sur; Intensity III: sa Butuan City; Kidapawan City; Tagum City; Panabo City; Compostela Valley; Matanao, Davao del Sur samtang intensity II sa San Francisco, Agusan del Sur; Cotabato City; Gen. Santos City; Koronadal City; Polomolok, South Cotabato; Alabel Sarangani.

Wa hinuoy gibiling damage ang maong linog apan gipaabot nga duna pay mga aftershocks nga mabatyagan sa mosunod nga mga adlaw.

Wala kini mabatyagi sa Kabisay-an, ug ang uwahing aftershock sa 7.2 magnitude nga linog niadtong Oktubre 15  nabatyagan alas 12 sa udto niadto pang Sabado. (BANAT NEWS)