ABC sa Lapu-lapu mopaimbestigar sa reklamo sa brgy kapitan sa agus

CEBU, Philippines - Susihon sa mga opisyal sa Association of Barangay Council o ABC sa dakbayan sa Lapu-Lapu ang reklamo sa bag-ong milingkod nga barangay kapitan sa barangay Agus nga gipangguba na ang mga gamit sa barangay hall sa iyang paglingkod niadtong Lunes.

Matud pa ni Lapu-Lapu City ABC President Jose Dungog dili pa siya makahatag og komentaryo hangtud nga wala pa niya makita ang sitwasyon sa barangay hall sa Brgy. Agus.

Apan buot ni Dungog nga mopakita og ebidensya ang kanhi kapitan sa barangay Agus nga si Remegio "Bo" Oyao nga iyahang kaugalingong kwarta ang gigastos alang sa mga nangaguba nga kahimanan.

Gipaabot pa usab sa ABC ang report sa bag-ong kapitan sa Brgy. Agus nga si Joven Lauron kalabot sa mga nangaguba nga mga kahimanan.

Kahinumduman nga atol sa unang adlaw sa paglingkod ni Lauron sa Brgy. Agus niadtong Lunes, nagkayamukat na ang barangay hall ug gipangguba ang mga gamit niini.

Lakip sa giingong nangaguba mao ang mga computers, gibuak ang bowl sa pansayan, gisuyakan ang ligid sa barangay patrol vehicle , gipanglarot ang mga wirings ug gipanglangkat ang mga bungbong. (BANAT NEWS)