Selosong bana misis gipatay
CEBU, Philippines - Usa ka asawa ang gidunggab patay sa iyang bana nga hubog human sa ilang panaglalis sa sitio Tulay barangay Cotcot sa lungsod sa Liloan sa alas 12:10 sa miaging kaadlawon.
Ang biktima naila nga si Alicia Yrog-irog, 42, molupyo sa maong lugar samtang mitahan sa kapolisan ang bana niini nga si Ricardo Yatan Yrog-irog, 43. Matud pa ni Marcelino Servilla ang imbestigador sa Liloan Police Station nga nahinabi sa Banat News nga dugay nang nagsige og away ang biktima ug ang suspetsado base sa impormasyong ilang nakuha gikan sa mga anak sa magtiayon.
Matud ni Servilla nga pirmeng mahubog ang suspek ug seloso maong magsige sila og away.Niadtong Biyernes gikatahong gikulata sa suspetsado ang biktima ug gani nakakuha ang biktima og Barangay Protection Order batok niini sumala pang Servilla.Sa miaging gabii, nahubog na usab ang suspek ug sa pag-uli sa ilaha gikalalis na usab ang asawa ug midagan ang biktima aron modangop sa balay sa silingang si Maria Luz Badonio apan naabtan kini sa iyang bana sa koral ug gidunggab sa pipila ka higayon.
Nakit-an pa ni Badonio matud pa nga buhi pa ang biktima ug sa wala pa kini mamatay nakasulti pa kini nga “gidunggab ko ni Ricky†dayon nawad-an na kini sa panimuot.
Nakaangkon og samad sa iyang tiyan ang biktima ingon man sa iyang wala nga dughan sumala pa ni Servilla, apan pag-abot sa ambulansya, ang nurse nga si Manuelito Cañete miingon nga wala nay vital signs ang biktima.
Gisulayan sa pagpangita sa kapolisan sa Liloan ang suspetsado sa lungsod sa Compostela apan nakaipsot kini, apan kagahapong adlawa mitahan ang suspetsado ug gikatakdang pasakaan og kaso nga parricide. (/EIM)(BANAT NEWS)
- Latest
