“Tsunami scare” sa Antique nakapalisang

CEBU, Philippines - Liboang mga survivors sa super typhoon Yolanda ang nangatkat sa mga bungtod ug tag-as nga lugar diha sa probinsya sa Antique tungod sa ‘text scares’ nga mikatap bahin sa paghapak sa tsunami sa ilang lugar kagahapon.

Sumala pa sa National Disaster Risk Reduction Management Council (NDRRMC) nakapalisang og maayo sa mga survivors ang maong bakak nga balita. Ang provincial DRRMC officials pinangulohan ni Broderick Train misaka sa gikahimutangan sa mga tawo aron sila kombinsiron nga molugsong sa ubos kay dili tinuod ang maong nikatap nga report. Giesplikaran nila ang mga tawo nga way mahitabo nga tsunami tungod kay wala may linog nga nahitabo niadtong tungora nga maoy sinugdanan sa mga tsunami.

Bisan ang Philippine Institute of Volcanology and Seismology miingon nga walay kusog nga linog nga natala niadtong adlawa ug wala sila mopagawas og tsunami alert.

Ang mga residente nga namakwit gikan sa mga coastal towns naggikan sa Laua-an, Culasi, Sebaste, Barbaza, Tibiao ug Pandan.

Matud pa nga gabiing-dako namakwit ang maong mga tawo sa kahadlok nga mabanlas sa dagat. Ang tigpamaba sa Antique PDRRMC nagdudang mga kriminal ang mihimo niini aron mapugos og biya sa ilang mga panimalay ang mga residente ug makahigayon sila pagpangawat sa pamiyaang mga balay. (BANAT NEWS)