CEBU, Philippines - Duha ka mga tawo ang napalgang patay sa managlahing lugar sa lalawigan sa Sugbo lakip na niini ang usa ka German national sa miaging adlaw. Patay ang usa ka lalaki nga nag-ayo sa bomba sa tubig sa usa ka farm human kini madakin-as ug natagak sa tabay sa Jolly Hog Farm sa sitio Magay, barangay Ocoy sa lungsod sa Sta. Fe sa alas 2:30 sa miaging hapon.Ang namatay giila nga si Joy Tapi Dublin, 27, kinsa patay na dihang nadangat sa Bantayan District Hospital.Sa imbestigasyon sa kapolisan sa lungsod sa Sta. Fe pinangulohan ni SPO1 Sheila Ilustrisimo nga natagak si Dublin sa atabay nga may gilawmon nga 15 ngadto sa 20 ka tiil. Ang maong biktima gisuwayan pag-rescue ni Dhelan Despi Escario nga miyembro sa Bantayan Disaster Brigade ug nasuta niini nga ang biktima nakaangkon og grabeng kadaot sa iyang lawas.Si Dr. Rowena Manalili, municipal health officer sa lungsod nga maoy mihiling sa lawas ni Dublin nagkanayon nga pagkalumos sa biktima ang hinungdan sa kamatayon niini.
Samtang napalgan na lang nga patay ang usa ka German national sa gawas nga bahin sa giabangan niini nga kwarto sa Quo Vadis Dive resort sa barangay Basdako sa lungsod sa Moalboal sa alas 7:00 sa buntag sa miaging adlaw.Ang napalgan nga patay naila nga si Bernd Helmut Strobi, 63, taga Berlin, Germany. Matud pa nga napalgan na lang sa usa ka Austrian national nga si Peter Klein nga nag-abang sa tupad nga kwarto ni Strobi nga naglingkod sa bangko gawas sa iyang kwarto nga wala nay kinabuhi.Gisuwayan pagdala si Strobi sa Badian District Hospital apan gideklarar na kini nga dead on arrival.Ang kapolisan nga misusi sa kwarto ni Strobi wala makakita og sinyales sa foul play ug nakita nga maayong pagkahan-ay sa iyang mga gamit ug nakakita sila og pipila ka tambal ug usa ka botelya sa alcohol sa lamesa sa maong lawak. (BANAT NEWS)