CEBU, Philippines - Ang embassy sa Taiwan mi-turn-over sa 530 ka toneladang relief goods ngadto sa Department of Social Welfare and Development (DSWD)-7 alang sa mga biktima sa bagyong Yolanda sa Eastern Visayas kagahapon sa buntag.
Ang mga relief goods gikarga sa Taiwanese Navy nga RCS Chong-Ho LST 232 nga miabot sa Cebu International Port.
Kini naglangkob sa crackers, mga sako sa bugas, kinarton nga canned goods, mineral water, sleeping bags, banig, habol, gamit sa kusina, toiletries, solar generator sets, diapers ug mga tambal.
"A friend in need is a friend in deed, Taiwan is always here to help as a way to show our brotherhood," matud ni deputy representative of the Taipei Economic and Cultural Office of the Philippines- Republic of China (Taiwan), Samson T. L. Chang.
Kini ang ikaduhang higayon nga ang nasud sa Taiwan mipadala og relief goods sa Pilipinas human adtong mga milabay’ng semana diin miabot sa 150 ka tonelada ang ilang napadala pinaagi sa air force sa Taiwan.
"We sincerely hope that what we have given would be of big help so they (typhoon victims) can soon move forward," si Chang midugang. (BANAT NEWS)