CEBU, Philippines - Si Talisay City Councilor Dorotheo Emit kinsa kaalyado sa Alayon mipasabot kagahapon kabahin sa iyang gihimong privilege speech kabahin sa paglaslas sa ilang quota sa mga job order (JO).
Niadtong milabay’ng sesyon, giesplikar ni Emit nga mas maayong laslasan gikan 50 ka job orders ngadto na lang sa 20 job orders ang matag konsehal.
Ang laslason nga 30 adto ikarga sa mayor, apan ang budget unta alang kanila buot ni Emit nga ipabilin gihapon ngadto sa mga konsehal aron itabang sa marginalized sector sama sa mga mananagat, mag-uuma, grupo sa kababayen-an, senior citizen, mga drayber sa traysikol ug traysikad.
Matud ni Emit nga nabantayan niya kung daghan og quota ang mga konsehal, labad kini sa ulo tungod kay daghang mangasuko kung dili makabalik sa trabaho ang usa ka JO.
Ang kasagarang gipangdawat nga JO mga supporter kini sa mga opisyal sa siyudad.
Matud ni Emit mapalapad pa sa siyudad ang paghatag og tabang sa kabus sa maong paagi ug mas maayong gahinan na lang ang mga programa aron makat-on ang mga kabus sa pagpanginabuhi.
Sa 30 ka mga JO gibana-banang mokabat ngadto sa kapin sa P3 milyones ang igahin nga budget sa siyudad kada buwan, apan matud ni Emit nga kapin sa P1 milyon lang niini ang ilang pangayoon alang sa marginal sector ug ang sobrang budget magamit pa kini sa executive department ngadto sa mga dagkung proyekto. (BANAT NEWS)