Lapu-Lapu City employees wa una’y Christmas party

CEBU, Philippines - Gikanselar ni Lapulapu City Mayor Paz Radaza ang Christmas party sa lokal nga kagamhanan sa Lapu-Lapu nunot sa nasinating trahedya sa silingang probinsiya sa Leyte ug amihanang bahin sa Sugbu.

"Salikwaot kaayo nga maglipaylipay ang mga kawani sa dakbayan sa Lapu-Lapu luyo sa katalagman nga nasinati sa probinsiya sa Leyte ug amihanang bahin sa Sugbu nga naigo sa bagyong Yolanda," sumala pa ni Radaza.

Igo na lang silang magpamisa pasalamat sa Birhen sa Regla ang mga kawani tungod sa pagluwas sa dakbayan sa Lapulapu ngadto sa mga katalagman.

Sukwahi kini sa mga milabay’ng tuig nga dunay bongga nga pagkaon ug mga papremyo atol sa ilang Christmas party apan karon ang gahin niini ilang idonar ngadto sa mga biktima sa kalamidad. Hinuon gipadayag sa mayor nga magpadayon ang Christmas party alang sa tres mil ka mga batang libodsuroy karong Disyembre 1 ug sa  Persons With Disability o PWD.

Lakip sa prayoridad hinuon ni Radaza mao ang pagpagawas sa pundo alang sa Christmas bonus sa iyang mga kawani. (BANAT NEWS)