Level 3 drug pusher sikop
CEBU, Philippines - Nasikop sa mga sakop sa Provincial Intelligence Detection and Management Branch (PIDMB) sa Cebu Provincial Police Office (CPPO) ang usa ka level 3 drug pusher sa barangay Pulpogan, lungsod sa Consolacion sa alas 5:00 sa miaging hapon.
Ang suspetsado naila nga si Rolito Osabel alyas Roy Bukog, 43, molupyo sa barangay Pulpogan.
Matud sa hepe sa PIDMB Supt. Rodolfo Albotra nga nahinabi sa mga tigbalita nga si Osabel makabaligya og drugas nga di momenus 25 gramos matag semana sa barangay Pulpogan.
Ang suspetsado matud pa ni Albotra idlas kaayo apan nasikop nila kini sa miaging adlaw sa pagpanguna ni Senior Insp. Leo Logroño.
Nasakmit gikan sa suspetsado ang duha ka dakong putos sa shabu ug 36 ka gagmay nga putos nga matud pa ni Albotra nga mokabat og P40 mil .
Laing nasakmit gikan sa suspetsado ang P400 nga buy bust money, usa ka lighter, aluminum tin can, improvised tooter, ug linikit nga aluminum foil.
Gawas niining tanan nasakmit usab gikan sa suspetsado ang usa ka kalibre .45 nga pistola nga may pito ka bala ug usa ka .22 nga magnum revolver nga may pito usab ka mga bala ug usa ka unit nga suppressor.
Sumala sa suspetsado nga nahinabi sa mga tigbalita nga binilin lang kaniya ang armas ug dili gyud kini iyaha ug wala kini mohatag og komento kung iyaha ba gyud ang shabu nga nasakmit sa mga otoridad. (BANAT NEWS)
- Latest
