Matag dept. head gisukit unsay ilang proyekto

CEBU, Philippines - Ang mga sakop sa Committee on Budget and Finance sa konseho sa dakbayan sa Sugbo motugyan sa matag department heads sa paghukom kun unsay mahinungdanon nila nga mga proyekto nga angayang kagahinan og budget.

Himuon kini sa mga konsehal tungod kay sigurado na nga dili aprobahan sa konseho ang kinatibuk-ang P10.5 Bilyones nga budget nga gisugyot ni Mayor Michael Rama para sunod tuig.

Si Konsehal Noel Eleuterio Wenceslao, vice chairman sa Committee on Budget and Finance, mipasabot nga ang gisugyot nga gahin alang sa sweldo ug ubang allowances sa mga kawani ilang aprobahan sa konseho.

Apan matud ni Wenceslao nga ang ubang gisugyot nga budget sama sa pagpamalit og dugang mga sakyanan, pagtugot og mga proyekto nga walay klaro ang kwarta nga gamiton, dili kini ilakip sa pag-aprobar sa budget.

Gipasabot ni Konsehal Margarita “Margot” Osmeña, pangulo sa Committee on Budget and Finance, nga samtang daku kaayo ang gisugyot ni Mayor Rama nga budget alang sa sunod tuig apan dili kini makolekta ang maong kantidad.

Ang mga sakop sa Local Finance Committee nga gilangkoban sa City Treasurer, Budget Officer ug Planning and Development Officer, mitataw nga mokabat lang sa P4 Bilyones ang gilantaw nila nga buhis nga makolekta sa tibuok tuig 2014.

Samtang gisugyot sa Local Finance Committee pinaagi sa mando sa mayor nga P10.5 Bilyones ang kantidad sa Annual Budget, ang P6 Bilyones niini gilantaw sa mayor nga adto kuhaon sa halin sa yuta sa South Road Properties.

Matud ni Konsehal Osmeña nga wala pa’y kasiguroan nga makabaligya ang dakbayan sa Sugbo og P6 Bilyones nga kantidad sa yuta bisan pa og duna na’y tinguha ang SM Prime Holdings nga mopalit og dugang yuta sa SRP.

Gipasabot ni Osmeña nga kun mahinayon ang pagbaligya sa 26 ektaryas nga yuta sa SRP sa kantidad nga kapin sa P5 Bilyones, mahimo ra kini nga gamiton sa mayor pinaagi sa Supplemental Budget.

Sa nagpadayon nga budget hearing, ang mga department head gitagsa-tagsa pagpatawag ug gipangutana sa mga konsehal unsay ilang mga priority projects sa ilang opisina.  (BANAT NEWS)