CEBU, Philippines - Duha ka tawo nga nagdala og armas nadakpan sa kapolisan sa managlahing takna ug dapit sa dakbayan sa Danao niadtong miaging Domingo.
Si PO2 Jumar Salomon sa kapolisan sa maong dakbayan miingon nga sa alas 12:00 pasado ang takna sa udto sa maong adlaw didto sa barangay Masaba ilang nadawat ang alarma kalabot sa armadong lalaki.
Gitubag nila ni PO2 Salomon ug PO1 Rene Catamora II ang maong alarma nga miresulta sa pagkasikop ni Socrates Lawas Barriga, 25, wala’y trabaho ug nagpuyo sa maong dapit.
Nakuha sa mga polis ang giluklok niining calibre .22 nga may tulo ka buhing bala.
Dugang alarma sa kapolisan alas 4:00 pasado ang takna sa hapon sa maong adlaw labot usab sa suspetsado sa pagpamusil sa dalan Lapu-Lapu sa barangay Suba niadtong Nobiyembre 17 sa alas 12:00 ang takna sa tungang gabii .
Si Ric Cuer Bracero, 39, nga taga San Miguel sa lungsod sa San Remegio kinsa giingong nasigpatan sa mga tawo didto sa PUJ terminal sa barangay Poblacion sa maong dakbayan nga nagtangkil og armas de fuego.
Matud pa ni PO3 Marlon Remollo nga dali nilang gihimoan og pakisusi ug ang suspetsado nga nakamatikod sa ilang pag-abot dali nga milanit sa giluklok niining armas ug gition kini ngadto kanila.
Si PO2 Remollo miingon nga samtang nagtion kanila ang maong suspetsado og armas ang lain nilang kauban nga mga polis dali usab nga milipot sa luyo sa maong suspetsado ug dali usab nila kining gisignit.
Giilog dayon ang armas niini nga kalibre .22 nga adunay tulo ka mga buhing bala.
Nunot sa pagkasakmit sa gidalang armas sa maong suspetsado naandan nilang gihimo ang pagrikisa sa kalawasan sa ilang dinakpan ug nadiskobrehan usab nila ang gidala niini usa ka pakete shabu nga gisulod sa iyang bulsa
Matud pa sa kapolisan nga labing mibug-at ang kaso sa maong suspek. (BANAT NEWS)