Duha ka balay nasunog sa Mandaue

CEBU, Philippines - Mokabat sa P100,000 ang kantidad sa gibiling danyos sa duha ka panimalay nga nasunog sa dalan SD Ybañez sa barangay Ibabao, dakbayan sa Mandaue nga gialarma sa mga bombero alas 9:30 ang takna kagahapon sa buntag ug usa ang naugdaw ug usa usab ang nakasinati og gamay nga kadaut niini.

Si SFO1 Julius Lua, imbestigador sa Bureau of Fire Protection (BFP) sa maong dakbayan nga nahinabi sa Banat News miingon nga ang duha ka panimalay nga nasunog gipanag-iya ni Flora Barte nga nagpuyo usab sa maong dapit.

Ang kalayo nagsugod sa kisame sa pikas balay ni Barte nga gituohang ang hinungdan mao ang short circuit sa kuryente ug kay ginama man kini sa light materials dali lamang usab ang pagkaylap niini.

Dugang pa ni SFO1 Lua nga ang pikas nga balay nga gipanag-iya gihapon niini mao na usab unta ang gisugdan sa pagsilab sa kalayo apan dali kini nilang napawong sa ilang pagpasirit og tubig sa ilang paghidangat sa maong dapit.

Nakontrol ang kalayo sulod sa 5-minutos ug wala na kini makatapon pa sa uban nga mga balay nga sikbit lamang usab niini.

Wala’y gikatahong naangol nga molupyo o nakalas nga kinabuhi. (BANAT NEWS)