CEBU, Philippines - Giawhag ni Cebu City Vice Mayor Edgardo Labella ang kadagkoan sa Registry of Deeds nga hatagan og electronics copy sa mga titulo sa yuta kadtong taga Tacloban nga gusto’ng moprenda o mobaligya sa ilang katigayunan aron makapatukod sila pagbalik og panimalay.
Ang lakang ni Labella iyang gihimo dihang nasayran niya nga daghan sa mga anaa karon sa lainlaing evacuation centers dinhi sa dakbayan sa Sugbo ug ubang dapit sa Sugbo dili lang mga ordinaryong mga tawo.
Matud ni Labella nga iyang nasayran nga daghan sa mga bakwit nanag-iya og kayutaan didto sa Tacloban apan ang problema nila kay dili sila makabaligya tungod kay apil nga nangahanaw ang mga titulo sa ilang yuta pagkaguba sa ilang kabalayan.
Si Labella gipasaligan sa mga opisyal sa Registry of Deeds nga kun adunay moduol kanila og manginahanglan og electronics copy sa ilang mga titulo sa yuta hatagan nila kini sa maong mga dokumento pinaagi sa pakigtambayayong sa ilang central office.
Gipasabot ni Labella nga angayang tabangan kining maong mga pamilya nga nahiagum sa grabeng kabangis niadtong bagyo nga Yolanda.
Si Ester Concha nga maoy pangulo sa Department of Social Welfare and Services (DSWS) sa City Hall miingon nga duna gani tag-iya og daghang mga sakyanan sa Tacloban nga human sa bagyo miapil paglinya nga nangayo’g pagkaon sa kagamhanan.
Matud ni Labella nga makigtagbo siya pag-usab sa kadagkoan sa Registry of Deeds aron maplansa nila ang tanang mga detalyi kun unsaon sa mga taga Tacloban ang pagkuha’g electronics copy sa ilang mga titulo kun kini ilang gikinahanglan. (BANAT NEWS)