3 bata nangawat og relief goods

CEBU, Philippines - Nadakpan ang tulo ka minor nga bata nga nagpalusot nga misalmot unta sa pagtabang og putos sa mga gidonar nga pagkaon sa sulod sa Cebu International Convention Center (CICC) sa dakbayan sa Mandaue kagahapon sa buntag.

Si Nila Fedillaga, tigpamaba sa Technical Education Skills and Development Administration (TESDA) 7 miingon nga nangayo sila og mga sakop sa kapolisan sa Mandaue City Police Office (MCPO) nga mohimo sa pagpaniid sa palibot sa CICC sa pagsiguro nga kalikayan ang pagpangawat sa mga gipamutos nga hinabang sa nagbulontaryo sa pagtabang.

Matud pa niya nga andam sila nga modawat ni bisan kinsang volunteers sa pagpamutos sa mga hinabang apan ilang gisiguro nga kalikayan usab ang pagsulod sa mga nagpakaaron-ingnon nga moboluntaryo apan ang pagpangawat diay ang katuyoan.

Ang tulo ka minor de edad nga mga lalaki  nag-iyahay na unta sa pagbitbit sa mga pinutos nga donasyon sa ilang paggawas apan gisugat kini sa mga polis sa Presinto 1 ug ilang gidakop.

Si PO2 Jesson Estrera sa kapolisan sa nahisgotang presinto nga nahinabi sa Banat News miingon nga wala na lamang nila ibalhog sa detention cell ang tulo ka mga bata nga nadakpan ug ilang  gitugyan sa buhatan sa  Department of Social Welfare and Development sa maong dakbayan. (/EIM)(BANAT NEWS)