Talisay employees bansayon bahin sa saktong buhaton kung may emerhensiya

CEBU, Philippines - Ang Talisay City Fire Department mopahigayon og pagbansay ngadto sa mga kawani sa City Hall sa angay nilang buhaton kung dunay mga emerhensiya nga mahitabo sama sa linog ug bagyo.

Ang bag-ong hepe sa Talisay  City Fire Department nga si Senior Insp. Randy Mendaros mibutyag sa Banat News nga naghuwat na lang sila sa tubag sa ilang request nga gipadangat ngadto sa kagamhanan sa siyudad kabahin  sa maong katuyoan.

Matud niya nga magpili sila og mga kawani matag departamento sa City Hall nga mapaubos sa pagbansay-bansay sa mga buhaton kung dunay mga emerhensiya o katalagman nga mahitabo.

Kasagaran karong mga kawani sa City Hall mga bag-o ug nagkinahanglan kini nga ipaubos sa pagbansay-bansay sa ilang buhaton panahon sa emerhensiya.

Ang mga kawani nga mapaubos sa pagbansay-bansay mao unya ang mangulo o motudlo ngadto sa ilang mga kauban kung ugaling dunay mahitabong emerhensiya.

Lakip unya sa pagbansay ang pagpahigayon og first aid ug rescue. Gibutyag ni Mendaros nga mi-request usab siya og mga ekipo nga gamiton sa pagbansay-bansay sama sa mga pisi diin magamit kini sa paghigot ngadto sa usa ka tawo nga i-rescue diha ibabaw sa building. (/EIM)(BANAT NEWS)