CEBU, Philippines - Kritikal ang kahimtang sa usa ka manindahay og isda nga gikatahapan nga nag-sideline usab sa pagpamaligya og shabu sa lungsod sa Consolacion dihang gipusil alas-8 pasado ang takna sa miaging gabii.
Ang napusilan mao si Roger Zarona, 33, nagpuyo sa maong dapit samtang wala pa maila kun kinsa ang lalaking mipusil sa biktima. Si PO1 Louie Ferrer sa kapolisan sa maong lungsod nga nahinabi sa Banat News miingon nga naglingkod lang ang biktima sa gawas sa ilang panimalay dihang giduol kini sa wala hiilhing lalaki ug kalit lang gipusil.
Naigo sa iyang bukton ang biktima ug milapos ang bala sa kilid sa lawas niini. Gidala kini sa Eversely Child Sanitarium General Hospital ug gibalhin sa Vicente Sotto Memorial Medical Center sa dakbayan sa Sugbo alang sa dugang pag-atiman.
Dugang pa ni Ferrer nga wala’y mga saksi sa maong pagpamusil nga nakaila sa mamumuno sa biktima kinsa dali kaayong nakasibat pahilayo. (BANAT NEWS)