Mamuhatay og paltik gipatay sud sa Chinese Cemetery

CEBU, Philippines - Usa ka mamuhatay og armas ang gipusil patay sa wala pa mailhing tawo atubangan mismo sa iyang usa ka tuig nga anak ug sa iyang live-in nga amang ug bungol sa Chinese Cemetery sa barangay Carreta, Cebu City sa miaging adlaw. Ang biktima naila nga si George Dela Cruz, 29, nga nakaangkon og daghang samad pinusilan sa iyang ulo nga hinungdan sa hinanaling kamatayon niini.

Samtang ang suspetsado gihulagway lang nga nagsul-ob og bonnet matud pa ni SPO1 Ruth Violango sa homicide section. Matud pa ni Violango nga ang nagpusil sa biktima interesado sa iyang trabaho tungod kay gikuha man niini ang mga kagamitan sa biktima.

Ang kapuyo sa biktima  nga amang ug bungol mao ra gyud ang saksi sa maong panghitabo gawas sa usa pa ka tuig nila nga anak.

Matud pa ni Violango nga kinahanglan pa sila og interpreter aron magkasinabtanay sila sa kapuyo sa biktima. Base sa inisyal nga imbistigasyon sa team ni Violango nga ang biktima kuyog sa iyang live-in partner ug anak natulog sa ilang payag sulod sa sam-ang.

Matud pa nga ang nagbinugtong nga lalaki naabot ug miiwas sa kurtina sa ilang kwarto ug mipusil patay sa biktima samtang kini natulog.

Human mapusilan sa suspetsado ang biktima naglakaw ra pud kini bitbit ang metal box nga sudlanan sa gamit sa pagbuhat og armas sa biktima. Matud pa nga usa pa lang ka semana nga nagpuyo sa Chinese Cemetery ang biktima ug nibalhin kini gikan sa dakbayan sa Danao. (BANAT NEWS)