#Bangon SugBohol Report

Mapasalamaton ang tanang nagpaluyo sa #Bangon SugBohol Movement sa inyong hinugpong nga suporta sa maong kalihokan isip tabang ngadto sa nahiagum sa epekto sa linog dinhi sa Sugbo, ingon man sa Bohol.

Ania ang hingpit nga asoy, pinaagi og press conference gipahigayon niadtong Nobiyembre 5, aron masubay ang gihatdan sa inyong hinabang. Giulohan kining taho og “Operation Walang Iwanan - Bohol Relief Operations Report.”

A. Command Center. Didto gimontar sa Mater Dei College sa Barangay Cabulihan, Tubigon niadtong Oktubre 18. Kaabag sa pagpang-apud apod mao ang Gawad Kalinga volunteers. Mipahuwam sab ang Mater Dei College og tulo ka sakyanang magamit sa relief distributions.

B. Coordination with local authorities. Gipahimug-atan sa #Bangon SugBohol Movement ang kamahinungdanon nga makig-alayon gyud sa local executive (mayor, barangay chairman, etc.) aron mahapsay ang sistema, makabuhat og rapid field assessment, maila ang barangay o sitio nga labing nagkinahanglan, makahibawo pila ang gidaghanon sa tagaan, ug makakupot sa listahan sa residente kun ugaling labing kinahanglanon kini

C.  Accomplishments.

1. Number of towns served – 14 (gikan sa Maribojoc, ngadtos Inabanga, Antequera, ug uban pa)

2. Number of barangays served    - 108

3. Number of food packs – 21,819

4. Liters of water – 74,371

5. Number of loot bags for kids (stress debriefing) – 5,000

D.  Logistics. Naka-hulam ang pundok og 14 ka trak ug 8 ka gagmay’ng sakyanan alang sa relief operations, aron mahatod bisan ngadto sa hilit nga lugar.

Ang maong sumada gipaambit nilang Cebu Chamber of Commerce and Industry president Lito R. Maderazo, CCCI Disaster Coordinating chairperson Regan Rex King, Mandaue Chamber of Commerce and Industry president Philip Tan, Gawad Kalinga national executive director Luis Oquinena, GK Cebu head Toby Florendo, ug ni Movement for a Livable Cebu president Marc Canton. Ang report gipahigayon sa SRD, ang auditing firm nga gipanag-iya ni kanhi CCCI president Sabino Dapat.

Transition housing

Gipadayag ni Gawad Kalinga national executive director Luis Oquinena nga giundang na ang hinabang may kalabotan ang pagkaon ug tubig tungod kay ang nahibiling P2,125,606.10 (total cash donations collected as of November 4, 2013) himoon nang “seed money” alang sa rehabilitation phase.

“Tapos na ang pagtulong natin sa kanila kung pagkain lang din ang pag-uusapan. Simulan na natin ang rehabilitation para matulungan na rin natin sila sa economic re-empowerment,” matud pa ni Oquinena. “Kasi papanong makakapaghanapbuhay yan nang maayos kung bahay nga nila di nila mapatayo.”

Nasayran nga ang transition housing project mogahin og gibanabanang P60,000 matag 20-25 square meters nga gidak-on o gilapdon sa balay. Gam-on kini pinaagi sa kombinasyon sa konkreto ug indigenous materials. Konkreto ang sawog, hangtod taga-hawak nga bungbong. Ang materyales pataas mamahimong amakan o ba kaha kahoy. Ang atop mamahimong corrugated/G.I. sheet lang gihapon (sin) o ba kaha nipa depende sa supply.

“This is the first time na Gawad Kalinga will carry out transition housing. Kasi sa iba naming projects, it’s more of permanent housing. Eh, hindi naman pwede sa Bohol kasi nga di na tayo sure sa lupang titirikan. We have to refer to geo-hazard maps and assessments, and kailangan natin ng clearances kasi nga may bago yatang hazard mapping na ginagawa because of a new fault line,” dungag niya.

Gipanglantawan nga tungod ning maong kakulian, lagmit nga sa Abril na hingpit nga mapadagan ang pagpatrabaho. Apan ilang paningkamotan nga masugdan na sa daling panahon labi na nga naghinangat na ang Pasko, isip gasa ngadto’s nawad-an og kapasilongan.

Matud pa niya nga pinaagi kang Gawad Kalinga – Bohol area coordinator Chinkee Sabanpan, masayran ra unya asang dapita unang tukoron ang maong transition housing project. “With P2M, we can start siguro mga 30 houses muna, on the hardest hit, kasi ang GK naman goes to the poorest-of-the-poor communities,” apas-sumpay ni Oquinena.

Samtang nagkanayon si Sabanpan nga hayan adto kini tukoron sa bisan hain niining lungsora: Talibon, Antequera o Ubay, labi na nga duna na sila’y existing memorandum of agreement sa Ubay kay 2009 pa man diay dunay GK projects sa Bohol. (BANAT NEWS)