CEBU, Philippines - Hapsay ang pagbahinbahin sa mga bakwit nga gikan sa Tacloban nga gipahiluna sa tulo ka mga evacuation center sa dakbayan sa Lapulapu .
Mikabat sa 85 ka pamilya gipahimutang sa Brgy. Gun-ob National High School, 26 ka pamilya sa Brgy. Looc Gym ug 38 ka pamilya ang anaa sa Brgy. Babag gym.
Matud pa ni Lapulapu City Mayor Paz Radaza nga gipangandaman og maayo sa kagamhanan sa dakbayan sa paghatag sa mga panginahanglan sa mga evacuees.
Nasaksihan sa Banat News ang pagpanghatag og mga pagkaon sa Brgy. Looc diin matud pa ni Barangay Coordinating Officer (BCO) Manny Dungog nga misubra na gani ang ubang pagkaon nga ilang gihatag sa mga bakwit. Miingon si Dungog nga kasagaran sa mga mi-donate og pagkaon mao ang mga tinun-an ug magtutudlo sa mga pribadong tunghaan kinsa personal nga mihatod niini ngadto sa mga evacuation centers. Lakip ang mga residente sa Brgy. Looc personal nga mitunol sa ilang mga "used clothings" alang sa maong mga bakwit.
Sa Gun-ob evacuation center tulo ka evacuees ang gidala sa Lapulapu City hospital human kini makasinati og sakit sa kalawasan. May usa usab ka 65-anyos nga lalaki ang gidala sa maong tambalanan nga giatake sa sakit sa kasingkasing.
Matud pa ni Alma Cabarubias, kawani sa Brgy. Gun-ob, 49 na lang ka pamilya ang nahibilin sa ilang evacuation center human kuhaa sa ilang mga kabanay nga taga Sugbo ang uban kanila.
Samtang gitakdang ang dugang pang mga bakwit ang moabot karong adlawa luwan sa PAF C-130 gikan sa Tacloban. (BANAT NEWS)