CEBU, Philippines - Patay ang usa ka babaye nga mi-check in sa sulod sa lawak sa Crisly Beach Resort sa sitio Landing sa barangay Catarman, lungsod sa Liloan ug ang suspetsado nga gituohang hinigugma niini nga gikauban sa pag-check in ang nadakpan sa kapolisan ug gibalhog sa bilanggoan.
Ang biktima mao si Sol Sabado Enriquez, 54, dalaga apan adunay kapuyo nga taga Tabok Camalig Bato sa dakbayan sa Danao ug ang suspetsado mao si Domincito Avila Gestopa, 40, minyo nga nagtrabaho isip drayber nga taga Tabunok, Maslog sa maong dakbayan. Si SPO4 Winrie Pilapil, imbestigador sa kapolisan sa maong lungsod nga nahinabi sa Banat News miingon nga alas -10 pasado ang takna sa Huwebes sa gabii nga mi-check in ang duha sa usa sa lawak sa nahisgutang beach resort.
Matud pa ni Pilapil nga ang tag-iya nga si Benjie Ricamora mitug-an kanila nga milungtad og pipila ka oras ang pag-check in sa duha hangtod nga ilang namatikdan ang kusog nga tingog sa duha nga daw nagkalalis.
Sa maong panaglalis maoy nagsunod ang mga paglagubo sa sulod sa lawak ug pipila pa ka gutlo ang nakalabay namatikdan nga nagdali na sa paggawas ang suspetsado.
Si Ricamora nga gibati og pagduhaduha misita sa suspetsado ug gisukitsukit kun asa kini paingon kinsa nangatarungan nga mopalit lang sa gawas og pagkaon.
Gipugngan dayon ni Ricamora ang suspetsado ug gipasusi una ang sulod sa lawak ug ilang nadiskubrehan nga naghigda ang biktima sa kama nga walay panimuot. Matud pa ni Pilapil nga human masuta ni Ricamora ang kahimtang sa kauban nga babaye dali kining nanawag sa ilang buhatan.
Si Pilapil miingon nga ilang gidala sa Liloan District Hospital ang biktima apan gideklarar kini sa mga doktor nga dead on arrival. (/EIM)(BANAT NEWS)