Duha ka traffic enforcer nanghulga sa ilang inspector

CEBU, Philippines - Duha ka mga traffic enforcers sa dakbayan sa Talisay  gipasanginlang nanghulga sa ilang inspector pinaagi sa paglanit sa ilang mga pusil niadtong Martes sa hapon didto sa barangay Tabunok, sa maong dakbayan. Ang biktima  nga si Hilario Abastillas, Jr., 47, traffic inspector sa siyudad mipasangil sa mga traffic enforcer nga sila si Bryan Quimada ug Boynel Labonada nga mipakita    kaniya sa ilang mga sinaw  kaayong pistola.

Sa imbestigasyon sa kapolisan,  nasuta  nga sa wala pa mahitabo ang insidente, si Abastillas uban  ni Harry Lambo nga miadto sa lugar nga nahitaboan aron mag-inspection sa mga enforcer  sa karsada. Apan giingong sa walay igong rason si Quimada mihulbot og kalibre .45 nga pistola gikan sa iyang waist bag ug gibutang  sa paa ni Abastillas.

Matud usab ni Abastillas nga mga alas 8:30 sa gabii didto sa buhatan sa City of Talisay Traffic Operation Development Authority (CT-TODA) ibabaw sa building  sa merkado publiko sa Tabunok, si Quimada ug Labonada sa walay igong rason giingong mipakita kini sa ilang mga pusil ug gituyo og butang atubangan sa biktima.

Ang supervisor sa CT-TODA nga si Cedentario Labajo nga nahinabi sa Banat News nagkanayon  nga dili siya makagama og aksiyon sa maong hitabo. Kini tungod kay wala pa siya ma-re-instate   nga  pormal  sa iyang posisyon human siya mi-leave tungod kay mikandidato siya isip kapitan sa ilang barangay niadtong milabay’ng eleksiyon sa barangay.

Hinuon matud niya nga magpahigayon siya og imbestigasyon niini aron makapadangat og report ngadto kang Bise Mayor Romeo Villarante kinsa maoy chairman sa CT-TODA. (/WC)(BANAT NEWS)