Rama modonar sa iyang usa ka buwang sweldo

CEBU, Philippines - Dugang paagi ni Mayor Michael Rama pagtabang sa mga biktima sa bagyong Yolanda sa amihanang kalungsoran sa Sugbo mao ang pagdonar sa iyang sweldo sa tibuok buwan sa Nobiyembre.

Matud ni Rama nga naglaom siya nga adunay ubang mga opisyal sa dakbayan, apil si Vice Mayor Edgardo Labella, mga konsehal ug department heads gidasig sa mayor nga mohatag usab og tagsa ka buwan nila nga sweldo.

Ang secretary sa mayor nga si Jovy Montecillo miingon nga kapin sa P52,000 ang net income ni Mayor Rama sa usa ka buwan. Hangtud kagahapon sa hapon, wala pay laing mga opisyal sa City Hall nga misundog sa gihimo sa mayor.

Ang amihanang bahin sa Sugbo grabe kaayo nga nakasinati og kadaut dihang gikuso-kuso sa bagyo nga Yolanda kaniadtong Biyernes.

Gani ang Cebu City Council miawhag man sa mayor nga ang dakbayan sa Sugbo mohatag og P5 milyones sa mga lungsod nga naapektahan pag-ayo sa bagyo.

Sa laing bahin, si Rama mitakda nga mobisita sa Ormoc City karong adlawa aron tan-awon personal ang kahimtang sa mga lumulopyo kang kansang kabalayan naguba sa bagyo.

Ang Ormoc ug Tacloban ingon man ang ubang mga lungsod sa Leyte pahatagan ni Rama og tabang-salapi aron makapabarog pagbalik ang mga biktima sa ilang kabalayan.  (BANAT NEWS)