Namuyo sa daplin sa Mananga pabalhinon

CEBU, Philippines - Mga nagpuyo diha sa daplin sa sapa sa Mananga habig sa kilid sa bag-ong merkado publiko sa barangay Lagtang ang pabalhinon tungod sa peligro sa baha.

Si city councilor Dennis Basillote, chairman sa committee on Urban Poor and Rural Development nagkanayon nga ang Local Housing Board misugyot sa pagpabalhin sa mga namuyo sa nahisgutang lugar.

Gibana-banang sobra na sa 10 ka pamilya ang namuyo diha sa nahisgutang lugar ug niadtong milabay’ng Biyernes atol sa bagyong Yolanda dunay mga kabalayan ang diriyot maanod dihang misaka ug mikusog ang bul-og sa tubig diha sa sapa.

Buot ni Basillote nga  i- relocate sila sa sitio Mananga 2 sa barangay Tabunok nga layo sa sapa. Niadtong milabay’ng Martes si Basillote mipalabang kini og resolusyon sa pagpabalhin sa mga namuyo diha daplin sa sapa sa may merkado sa Lagtang.

Ang siyudad duna pa kini P46 milyones nga pundo nga gihatag sa presidente sa nasud alang sa ipamalit og luna nga himuong relocation site kun ugaling ang maong luna kuwangon.

Sa milabay’ng tuig ang konseho sa siyudad miaproba sa resolusyon sa pagpangayo og P50 milyones nga budget ngadto sa presidente alang sa nahisgutang proyekto ug P4 milyones pa ang giingong nakuha sa maong budget.  (BANAT NEWS)