DSWD manghatag sa taga Leyte

CEBU, Philippines - Ang Department of Social Welfare and Development sa Central Visayas (DSWD-7) mang-apud-apod og 50 mil ka putos nga  pagkaon matag adlaw ngadto  sa dakbayan  sa Tacloban, sumala  ni Aileen  Lariba, ang  tigpamaba  sa maong  ahensya  kagahapon  atol  sa Kapihan  sa PIA.     Matud  pa  ni  Lariba  nga  ang  ilang gipangita  karon mao  ang  mga  boluntaryo  nga  motabang sa pagpamutos  sa  mga  hinabang.

Gawas  sa  mga  tawo  nga  mamutos  problema  pa usab  nila ang  mga  lugar  o  dapit  nga  kapundohan  nila sa  ilang  puston  nga  mga  hinabang aron adto  mamutos ug matuman  nila  ang  ilang  sagradong  katungdanan  sa  pagpakaon  sa mga  gutom  nga  biktima  sa bagyong  Yolanda.Sa pagkakaron  miingon  si Lariba  nga  gigamit  una  nila  ang  ilang  mga  buhatan sa rehiyon  nga nahimutang  sa MJ Cuenco  Ave., ug ang sa barangay Labangon, pulos  sa dakbayan  sa Sugbo.

Nakigsabot na  usab  sila sa mga  tinugyanan  sa tugpahanan  sa Mactan  alang  sa ilang  pundohanan  sa pagpamutos.Suliran  usab  nila ang  mga  sakyanan  nga  mohakot  sa  ilang  mga hinabang  nga  maglakip  sa bugas,  linatang  pagkaon,  noodles  ug  uban  pa nga  isud  sa matag  putos.Apan gisiguro  nila  nga  magpadala  na  sila  og tag-50 ka  libo  ka  putos  matag  adlaw  ug  hangtud  nga  dili  pa  momandar  ang  ilang  ulohang  buhatan  sa paghunong,  magpadayon  sila pagtuman    sa maong  katungdanan.   (BANAT NEWS)