CEBU, Philippines - Miabot na og 59 ka tawo ang gidaghanon sa mga nakalas nga mga taga Central Visayas tungod sa bagyong Yolanda sumala pa sa labing ulahing natala sa Regional Disaster Risk Reduction and Management Council 7 sa tibook rehiyon.
Sa mga nakalas 58 niini ang gikan sa Sugbo ug usa sa Bohol samtang 99 ka mga tawo ang angol ug siyam ang missing. Lakip sa mga nakalas ang usa ka tawo sa lungsod sa Balamban, 14 sa Bantayan, 11 sa dakbayan sa Bogo, siyam sa Daanbantayan, usa sa dakbayan sa Lapu-Lapu, tulo sa Madridejos, tulo sa Medellin, usa sa Pilar, siyam sa San Remigio, tulo sa Sta. Fe, duha sa Sogod ug usa sa Tabogon.
Samtang sagad sa mga naangol gikan sa lungsod sa Madridejos nga naglakip sa 95 ka mga tawo, usa sa Minglanilla ug tulo sa San Francisco. Siyam usab ka tawo ang missing lakip na niini ang usa sa Balamban, tulo sa Bantayan, tulo sa San Remigio, usa sa Sta. Fe ug sa dakbayan sa Talisay.
Samtang dul-an sa 70 mil ka mga pamilya ang namakwit sa pag-igo sa bagyo ug kapin sa 320 mil ka mga tawo ang direktang naapektahan niini.
Kapin usab sa kwatro mil ka mga balay ang na-damaged ug kapin sa otso mil ang hingpit nga naguba sa maong bagyo. (BANAT NEWS)