Kadalanan sa Mandaue gihinloan dayon

CEBU, Philippines - Gilusad  dayon  sa  mga sakop sa Traffic Enforcement Agency of Mandaue (TEAM) ug sa  Engineering Office sa  maong dakbayan sa Mandaue ang clearing operation sa kadalanan sa  dakbayan human   milabay   ang bagyong Yolanda sa Sugbo kagahapon.

Si Mayor Jonas Cortes sa maong  dakbayan  maoy  mipaandam sa mga kahimanan alang sa paghawan  sa mga sagpot sa kadalanan  nga nalakip sa sanga sa mga kahoy ug uban pa. Ang dalan A.C. Cortes sa barangay Cambaro sa dakbayan sa Mandaue maoy usa sa  nakasinati  og  problema  gumikan  sa usa ka poste sa Visayan Electric Company nga  miharag sa taliwala sa karsada.

Dugang nga naalihan mao ang U.N. Avenue sa barangay Umapad sa maong dakbayan tungod usab sa mga sanga sa kahoy nga mibabag  sa taliwala sa karsada.

Si Roger Paller nga tigpamaba sa kagamhanan sa maong dakbayan nga nahinabi sa Banat News miingon nga sayo pa sa hapon sa miaging adlaw ang mga nagkadaiyang establisamento nga  may mga billboard sa daplin sa kadalanan sayo  kaayong  mitangtang  niini.

Gawas sa pagtangtang sa maong mga billboard ang engineering office sa dakbayan  namutol daan sa mga sanga sa kahoy nga  mibabag sa daplin sa kadalanan sa palibot sa maong dakbayan. (/WC)(BANAT NEWS)