CEBU, Philippines - Gipadad-an na sa Bureau of Fire and Protection kon BFP-7 og demand letter ang pangulo sa Cebu City Medical Center sa pagpahawa na sa ilang buhatan.
Sumala pa ni BFP-7 regional director, Supt. Maria Luisa Hadjula nga maong sulat sa pagbakante sa BFP building gihatud na ngadto kang Dr. Gloria Duterte ang Medical Director sa CCMC niadtong niaging adlaw.
Gipasabot ni Hadula nga gusto na nilang gamiton og balik ang ilang building aron matarong sila og pahiluna.
Ang Cebu City, nangandam na sa legal nga lakang aron mapugos ang BFP pagbiya sa ilang building nga anaa mahimutang sa Natalio Bacalso Avenue.
Matud ni Vice Mayor Edgardo Labella nga hayan mopasaka sila’g kaso nga Unlawful Detainer batok sa mga opisyal sa BFP nga nagdumili sa pagtugyan sa property sa dakbayan sa Sugbo nga buot gamiton ni Mayor Michael Rama isip temporaryo nga ospital.
Kahinumdoman nga temporaryong gibutang sa BFP building ang CCMC tungod sa rekomendasyon sa mga engineers nga delikado nang gamiton ang karaang CCMC tungod sa linog. (BANAT NEWS)