Minibus misampak sa poste 5 angol
CEBU, Philippines - Lima ang angol human mibangga ang minibus sa poste sa kuryente kagahapon sa buntag sa may dalan N. Bacalso sa eskina sa Salazar St. dihang milikay kini sa usa ka van-for-hire.
Ang minibus adunay plaka nga GXR-964 nga gimaneho ni Bienvenido Canedo, sa Campo 8, Toledo City, paingon sa habagatang Sugbo sa dihang nahitabo ang maong aksidente.
Matud pa nga mi-overtake ang van-for-hire hinungdan nga milikay si Canedo nga paingon unta sa center island apan dali niyang nalubag ang manobela ug didto punta sa poste sa kuryente hinungdan sa pagkaangol sa upat ka mga sakay niini.
Samdan si Canedo, ang konduktor nga si Lito Cabornel; helper nga si Elmaer Antona; Rolando Albano ug ang pasahero nga si Versache Manguhid, taga-Barangay Lawaan, Talisay City.
Daling gidala sa Vicente Sotto Memorial Medical Center ang mga biktima.
Si Canedo mibutyag nga iyang dagan anaa lang sa 25 ngadto sa 30 kilometros kada oras ang gikusgon apan sukwahi kini sa pamahayag sa mga nakakita nga matud pa kusog gyud ang dagan sa minibus.
“Hinay ra man akong dagan nilikay lang ko sa center island maong diri punta sa poste,†butyag ni Canedo sa TV Patrol Central Visayas.
Ang Highway Patrol Unit nagpaabot karon sa mga reklamante aron sa pagpasaka og kasong reckless imprudence resulting in physical injuries batok kang Canedo nga anaa karon sa tambalanan. (BANAT NEWS)
- Latest
