Hitman ni Tabanao kauban ni Aves kaniadto, gikasohan na
CEBU, Philippines - Human sa dul-an duha ka buwan nga pagpaabot gipasaka na gyud sa kapulisan ang kasong murder batok sa gitumbok nga killer sa tigbalita ug kanhi tigpamaba sa Philippine Drug Enforcement Agency-7 nga si Jessie Tabanao.
Ang gikasohan mao si Arnel Solivar, 35, kinsa positibong gitumbok sa tulo ka mga eyewitnesses.
Si Sr. Supt. Noli Romana, CCPO director, mibutyag nga bisan pa man napasaka na ang maong kaso padayun sila sa ilang imbestigasyon aron sa pag-ila sa mastermind sa krimen nga gitumbok nga work-related.
Si City Intelligence Branch chief, Chief Insp. Romeo Santander, midugang nga si Solivar nalambigit sa daghan krimen niadtong tuig 2005 ug 2006 isip kauban ni Aristotle Aves kinsa gipasanginlang hitman sa Alpha Kappa Rho (Akrho) ug maoy prime suspect sa ‘drive-by shootings’ sa Metro Cebu. “Considered marksman ni siya (Solivar) kay elite na sa firearm unya left-handed pud,†matud ni Santander kinsa midugang nga si Solivar migamit og .9mm nga pistola.
Si Aves suspek sa 17 ka mga fraternity-related killings sa Cebu City diin 13 niini ang napasaka sa korte. Laing unom ka murder charges ug upat ka frustrated murder charges. Duha ka attempted homicide ug usa ang homicide case.
Nakadawat og taho ang kapulisan nga nalambigit si Solivar sa ginadiling drugas.
Sa iyang bahin si Katrina Tabanao, asawa ni Jessie, mapasalamaton sa CCPO sa paghatag og hustisya sa kamatayon sa iyang bana.
“Big development ang filing sa case but dili ni enough nga makabayad sa pain pero confident ko nga madakpan ra ni siya,†matud niya. (BANAT NEWS)
- Latest
