CEBU, Philippines - Gipahalipayan ni Mayor Michael Rama ang tanang kapolisan, mga barangay tanod, civilian peace keeping volunteers ug traffic enforcers sa daku nila’ng natabang alang sa malinawong pagsaulog sa All Saint’s ug All Soul’s Days.
Matud ni Rama nga wala g’yud siya’y nadawat nga mga dagkong problema sa 22 ka mga sam-ang dinhi sa dakbayan sa Sugbo, ug kadaghanan niini iyang nabisitahan atol sa duha ka adlaw nga kalihukan.
Gidayeg sa mayor si Senior Superintendent Noli Romana, ang direktor sa kapolisan dinhi sa dakbayan, sa maayo nga pagkasuperbisar sa pagbantay sa lainlaing mga sam-ang.
Gipasalamatan usab sa mayor ang katawhan nga miabag sa kapolisan kabahin sa pagdili nga magdala sila’g ilimnong makahubog, mga sound systems ug uban pa nga gidili nga butang sulod sa menteryo.
Sa nanglabay’ng katuigan ang pagdala og mga sound system sulod sa sam-ang gitugot ra, apan daghan ang mireklamo kay makadisturbo kini sa pag-ampo sa uban tungod sa grabe nga kasaba.
Duna ‘say mga higayon kaniadto dihang gitugot pa ang pagpasulod og mga ilimnon apan dunay mag-away kun mangahubog na sa ilang mga nainum. Kini maoy rason nga gihugtan sa pagpatuman ang pagdili sa mga ilimnon sulod sa sam-ang.
Bisan og gisigi na sa pagpublikar ug pagsangyaw ang maong pagdili sa pagdala’g ilimnong makahubog apan duna gihapo’y misuway sa pagpalusot og mga bino apan nasakpan sila sa kapolisan. (/EIM) (BANAT NEWS)